#Ուղիղ. Կրթությունից աշխատանք` մեկ քայլ. Ապագա հիմնադրամ

Մարության և Կարապետյան գործարար ընտանիքների կողմից ստեղծված «Ապագա» բարեգործական հիմնադրամը ամփոփեց նախորդ տարվա արդյունքները։ 
Հիմնադրամը գործում է 2019 թվականից և իրականացնում է «Կրթությունից աշխատանք՝ մեկ քայլ» նախագիծը, որի շրջանակներում ավարտական կուրսի ուսանողները հնարավորություն են ստանում 5 ամիս տևողությամբ պրակտիկայի ընթացքում գիտելիքներ ստանալ ծրագրի մասնակից մասնավոր ընկերությունների և պետական հաստատությունների մոտ, նաև 1 տարվա ուսման  վարձավճարի 80% փոխհատուցում։ Ծրագրի լավագույն մասնակիցները նաև մշտական աշխատանքի հնարավորություն են ստանում։
«Ապագա» բարեգործական հիմնադրամի գործադիր տնօրեն Ռոզա Սոլոմոնյանի կարծիքով․ «Սա հրաշալի հնարավորություն է ուսանողների համար, որոնք ցանկություն ունեն գործնական հմտությունները համադրել բուհական կրթության հետ»։

«Կրթությունից աշխատանք՝ մեկ քայլ» նախագիծը երկու կոմպոնենտ ունի՝ կրթական և պրակտիկ։ Կրթական բաղկացուցիչն իրականացվում է «Կամպուս» ուսանողական էկոհամակարգը՝ հիմնականում ներառելով նախագծին մասնակցող ընկերությունների վերին ղեկավար օղակների ներկայացուցիչներին` որպես դասախոս։ «Կամպուսի» ղեկավար Նարեկ Մարությանի խոսքով՝ մասնակից ուսանողները ստանում են ամենաարժեքավորը՝ արդեն ղեկավար պաշտոնում գտնվողների պրակտիկ փորձն ու գիտելիքը։ 
Պրակտիկ բաղկացուցիչում հիմնականում ներգրավված են այն ընկերությունները, որոնցում մասնակցություն ունեն Մարության և Կարապետյան գործարար ընտանիքները։ 
«Այս ընկերությունները իրենց ոլորտի առաջատարներն են։ Այստեղ իսկապես «խտացված» է թե՛ Հայաստանի, թե՛ միջազգային լավագույն փորձը, որն էլ այդ ընկերությունների ղեկավարները մեծ սիրով ու պատրաստակամությամբ կիսում են երիտասարդների հետ»,- ասում է «Ապագա» բարեգործական հիմնադրամի գործադիր տնօրեն Ռոզա Սոլոմոնյանը։
Ուսանողները կարող են դիմել հիմնադրամին այս հղումով։