Երևանի քաղաքապետարանի այսօրվա «որսը»

Երևանի ավագանու «Մայր Հայաստան» խմբակցության անդամ, քաղաքային իշխանությունների կամայական որոշումով մանդատից զրկված Սոնա Աղեկյանի ֆեյսբուքյան էջից տեղեկանում ենք, որ քաղաքապետարանի թիրախում որպես «որս» այսօր եղել է Ազատության 9/3 հասցեն։ Քաղաքապետարանի քանդող տեխնիկան ու աշխատակիցները հասցեում քանդել են ավտոտնակներ, ինքնակամ շինություններ։ 

Այս պատմության մեջ, սակայն ուշագրավ է նաև այն հանգամանքը, որ շինություններն օգտագործող բնակիչները մինչև վերջին րոպեն գույքահարկ են վճարել, իսկ քաղաքապետարանն ընդունել է այդ վճարները, դե իսկ ահազանգի հետքերով հասցե գնացած ավագանու նախկին անդամին բնակիչները հայտնել են, որ քանդումներն իրականացվում են առանց պատշաճ ծանուցումների, առանց բնակիչներին տարածքներն ազատելու համար խելամիտ ժամկետներ տրամադրելու։

Տեղում իրականացված նկարահանումներից պարզ է դառնում նաև, որ քաղաքապետարանը տարածքում գտնվող մարդկանց անվտանգությունն ապահովելու համար պատշաճ սահմանազատում չի իրականացնում տարածքում, փոշու նվազեցման համար համապատասխան միջոցներ չի կիրառում, իսկ քանդվող օբյեկտներից ընդամենը մի քանի տասնյակ մետրի վրա բնակելի, բազմաբնակարան շենքեր են։ Երևանի քաղաքապետարանի պատկերացրած համապատասխան միջոցներից միայն մեծաթիվ ոստիկանական ուժերն են տարածքում, որոնք երևի թե պետք է կանխեն քանդվող շինությունների տերերի չքանդելուն ուղղված հնարավոր գործողությունները։

Հետաքրքրական է նաև, որ քաղաքային իշխանությունները նման քանդումներ են իրականացնում այս նախընտրական, թեժ շրջանում, երբ թվում է թե ամեն ձայնը պետք է կարևոր լիներ,  բնակիչներին սիրաշահեին գույքային վնասներ պատճառելու փոխարեն։ Նախընտրական շրջանում սովորաբար իշխանությունները փորձում են սիրաշահել պոտենցիալ ընտրողներին, ահա՛ կարծես այդ տրամաբանության մեջ է նաև այսօր ավելի վաղ հայտնի դարձած Սուրեն Պապիկյանի որոշումը, որով նորակոչիկ զինծառայողների երդմնակալության առթիվ վերջիններիս երկօրյա արձակուրդ է տրամադրվելու։

Բնակիչների շրջանում կա մտավախություն որ իրենց քանդված շինությունների տարածքները քաղաքապետարանի «թեթև ձեռքով» կարող է անցնել մասնավորի և այդտեղ կարող են հայտնվել այլ շինություններ։