Ֆրանսիան ռազմական խորհրդական կուղարկի Հայաստան․ նոր մանրամասներ

Ֆրանսիան Հայաստան կուղարկի ռազմական խորհրդական և հատուկ ստորաբաժանումներ կպատրաստի ՀՀ ԶՈւ-ի համար։ Այս մասին X-ի միկրոբլոգում այս մասին գրել է Ֆրանսիայի պաշտպանական գերատեսչության ղեկավար Սեբաստիան Լըկորնյուն։

«Հայաստանը պետք է կարողանա պաշտպանել իրեն և իր բնակչությանը»,– հավելել է նա։

Լըկորնյուն թվարկել է այն ծրագրերն ու ուղղությունները, որոնց շուրջ կողմերը սկսել են կամ սկսելու են համագործակցել։
Նա հիշեցրել է, որ 2023 թվականի հունվարին Ֆրանսիան դեսպանատանը կից ռազմական կցորդ է նշանակել։ Համագործակցությունը ենթադրում է, որ ֆրանսիացի սպա (որպես ռազմական խորհրդական) կգործուղվի ՀՀ ՊՆ, բազմաթիվ աշխատանքային հանդիպումներ կլինեն, զինվորականներ կայցելեն, համագործակցություն կսկվի սերժանտներ և սպաներ պատրաստող ռազմաուսումնական հաստատությունների հետ:

Նախարարն առանձնահատուկ նշել է ՀՀ զինված ուժերի համար հատուկ ջոկատների նախապատրաստումը, հատկապես լեռնային տեղանքում մարտական գործողությունների և բարձր ճշգրտության հրաձգության համար:
«Ստորագրվել է երեք GM200 ռադար ձեռք բերելու պայմանագիր և հակաօդային պաշտպանության ոլորտում «Միստրալ» հրթիռներ ձեռք բերելու հուշագիր»,– գրել է նա։

Նա նաև նշել է, որ առաջիկայում ստուգում կանցնի Հայաստանի հակաօդային պաշտպանության համակարգը։

Հիշեցնենք` ՀՀ պաշտպանության նախարար Սուրեն Պապիկյանն ու Ֆրանսիայի պաշտպանական գերատեսչության ղեկավար Սեբաստիան Լըկորնյուն երեկ երկկողմ համագործակցության մասին փաստաթղթեր են ստորագրել։